ویرات کوہلی کی سنچری، بھارت نے فتح کے ساتھ ایشیا کپ مہم کا خاتمہ کر دیا۔

دبئی،  ویرات کوہلی (ناٹ آؤٹ 122) کی سنچری کے بعد بھونیشور کمار (4 رنز، پانچ وکٹ) کی مہلک بولنگ کی بدولت ہندوستان نے جمعرات کو ایشیا کپ کے سپر -4 میچ میں افغانستان کو 101 رنز سے شکست دی۔
بھارت نے پہلے بیٹنگ کرتے ہوئے مقررہ 20 اوورز میں 212 رنز بنائے تھے جس کے جواب میں افغانستان کی ٹیم پورا اوور کھیلنے کے بعد صرف 111 رنز بنا سکی۔
کوہلی نے آخر کار اپنی 71ویں سنچری اسکور کی، انہوں نے 61 گیندوں پر 12 چوکوں اور چھ چھکوں کی مدد سے 122 رنز بنائے۔ ٹی ٹوئنٹی انٹرنیشنل میں کوہلی کی یہ پہلی سنچری ہے۔ کوہلی کی یہ بین الاقوامی سنچری 1020 دنوں کے طویل انتظار کے بعد آئی ہے، جب کہ ان کی آخری سنچری 23 نومبر 2019 کو بنگلہ دیش کے خلاف کھیلے گئے ٹیسٹ میچ میں بنی۔
ایشیا کپ 2022 میں یہ ہندوستان کا آخری میچ تھا، جو پہلے ہی فائنل کی دوڑ سے باہر تھا، اور اسے جیت کر اپنی مہم کا خاتمہ کر دیا۔
ٹاس ہارنے کے بعد پہلے بیٹنگ کرتے ہوئے کے ایل راہول اور ویرات کوہلی نے ہندوستان کو شاندار آغاز فراہم کیا اور پہلی وکٹ کے لیے 119 رنز جوڑے۔ آؤٹ ہونے سے پہلے راہول نے 41 گیندوں میں چھ چوکوں اور دو چھکوں کی مدد سے 62 رنز بنائے۔
تیسرے نمبر پر بیٹنگ کرنے آئے سوریہ کمار یادو نے پہلی گیند پر چھکا لگایا لیکن دوسری گیند پر آؤٹ ہونے کے بعد پویلین لوٹ گئے۔
اس کے بعد وکٹ پر آنے والے رشبھ پنت نے کوہلی کا ساتھ دیا اور دونوں نے چوتھی وکٹ کے لیے 42 گیندوں میں 87 رنز کی شراکت کی۔ پنت نے اس شراکت میں صرف 20 رنز بنائے۔ کوہلی نے 19ویں اوور کی دوسری گیند پر چھکا لگا کر 84 اننگز کے بعد بین الاقوامی کرکٹ میں 100 رنز کا ہندسہ چھو لیا۔ کوہلی نے آخری اوور میں دو چھکے اور ایک چوکا لگا کر ہندوستان کو 20 اوورز میں 212 رنز تک پہنچا دیا۔
افغانستان ابھی کوہلی کی اننگز سے ابھرا بھی نہیں تھا کہ بھونیشور کمار نے دوسری اننگز میں ان کے اپر آرڈر کو ڈھیر کر دیا۔ بھونیشور نے نئی گیند کے ساتھ اپنی شاندار کارکردگی کا مظاہرہ کیا اور ایک میڈن سمیت چار اوورز میں پانچ وکٹ لیے۔
بھونیشور نے حضرت اللہ جزئی، رحمان اللہ گرباز اور نجیب اللہ زدران کو صفر پر آؤٹ کیا جبکہ کریم جنت دو رنز پر سلپ پر کیچ آؤٹ ہوئے۔
ارشدیپ نے بھونیشور کے ساتھ مل کر افغانستان کے کپتان محمد نبی کو آؤٹ کیا جس کے نتیجے میں 21 رنز کے اسکور پر 6 افغان بلے باز پویلین لوٹ گئے۔
افغانستان کی جانب سے ابراہیم زدران نے سب سے زیادہ 64 (59) رنز بنائے اور افغانستان کو پورے 20 اوورز کھیلنے میں مدد دی۔ مجیب الرحمان نے 18 (13) اور راشد خان نے 15 (19) رنز بنائے۔ دنیش کارتک نے 20ویں اوور میں 18 رنز دیے لیکن یہ افغانستان کی جیت کے لیے کافی نہیں تھے اور بھارت نے 101 رنز کی شاندار فتح حاصل کی۔
بھونیشور کے پنجوں کے علاوہ ارشدیپ، روی چندرن اشون اور دیپک ہڈا نے بھی ایک ایک وکٹ حاصل کی۔